အိမ်ထောင်ပြုခြင်းနှင့် ကွာရှင်းခြင်း

အိမ်ထောင်ပြုခြင်း

နိုင်ငံခြားသားနှင့် အိမ်ထောင်ပြုမည်ဆိုလျှင် လက်ထပ်မည့် နှစ်ဦးနှစ်ဖက်၏ နိုင်ငံတို့၏ ဥပဒေများအရ သက်ဆိုင်သည့် နိုင်ငံ ၂ နိုင်ငံစလုံးတွင် လိုအပ်သည့်ကိစ္စများဆောင်ရွက်ရပါမည်။ လိုအပ်သည့် စာရွက်စာတမ်းများ၊ မိခင်နိုင်ငံ၏ လက်ထပ်ခြင်းဆိုင်ရာ လုပ်ထုံးလုပ်နည်းကိုမူ အိမ်ထောင်ပြုကြောင်း အကြောင်းကြားစာတင်မည့် မြို့နယ်အစိုးရရုံးနှင့် နိုင်ငံအသီးသီး၏ သံရုံးထံသို့ စုံစမ်းမေးမြန်းပါ။

①သံရုံး၊ ကောင်စစ်ဝန်ရုံးများ

ဂျပန်နိုင်ငံသားနှင့်အိမ်ထောင်ပြုခြင်း: အိမ်ထောင်ပြုကြောင်းအကြောင်းကြားစာနှင့် အိမ်ထောင်ပြုနိုင်ကြောင်းထောက်ခံစာ စသည့်လိုအပ်သည့်စာရွက် စာတမ်းများကို လက်ထပ်မည့် လင်မယားနှစ်ဦးထဲက တစ်ဦး၏ လိပ်စာနှင့်သက်ဆိုင်သော မြို့နယ်ရုံး သို့မဟုတ် ဂျပန်နိုင်ငံသား၏ မိသားစုစာရင်းရှိ မြို့နယ်၏ မြို့နယ်ရုံးတွင် တင်ပြအကြောင်းကြားရပါမည်။ ထို့မြို့နယ်ရုံးမှ ထုတ်ပေးမည့် အိမ်ထောင်ပြုကြောင်းအသိအမှတ်ပြုထောက်ခံစာကိုယူပြီး မိခင်နိုင်ငံတွင် အိမ်ထောင်ပြုခြင်း ကိစ္စကို ဆက်လက်ဆောင်ရွက်သွားရပါမည်။
နိုင်ငံခြားသားအချင်းချင်းအိမ်ထောင်ပြုခြင်း: ဂျပန်နိုင်ငံနည်းဖြင့် အိမ်ထောင်ပြုလိုပါက လက်ထပ်မည့် လင်မယားနှစ်ဦးထဲကတစ်ဦး၏ လိပ်စာနှင့် သက်ဆိုင်သော မြို့နယ်ရုံးတွင် အိမ်ထောင်ပြုကြောင်းအကြောင်းကြားစာစသည့် လိုအပ်သည့်စာရွက် စာတမ်းများကို တင်ပြအကြောင်းကြားရပါမည်။ ထို့မြို့နယ်ရုံးမှ ထုတ်ပပေးမည့် အိမ်ထောင်ပြုကြောင်း အသိအမှတ်ပြုထောက်ခံစာကိုယူပြီး မိခင်နိုင်ငံတွင် အိမ်ထောင်ပြုခြင်းဆိုင်ရာကိစ္စများကို ဆက်လက် ဆောင်ရွက် ရပါမည်။

အိမ်ထောင်ပြုနိုင်ကြောင်းထောက်ခံစာ

အိမ်ထောင်ပြုလိုပါက နိုင်ငံခြားသားမှ တင်ပြရမည့် စာရွက်စာတမ်းဖြစ်ပါသည်။ မိခင်နိုင်ငံ၏ သံရုံး၊ ကောင်စစ်ဝန်ရုံးတွင် ထုတ်ယူနိုင်ပါလိမ့်မည်။ မြို့နယ်ရုံးကို တင်ပြသည့်အခါ နိုင်ငံခြားဘာသာဖြင့် ရေးသားပါက ဂျပန်ဘာဘာသို့ ဘာသာပြန်ပြီး ဘာသာပြန်ပေးသူ၏ အမည်ကို ရေးရပါမည်။

ကွာရှင်းခြင်း

ဂျပန်နိုင်ငံတွင်နေထိုင်နေသည့် နိုင်ငံခြားသားသည် ဂျပန်နိုင်ငံတွင် လင်မယားကွာရှင်းလိုပါက မြို့နယ်ရုံးသို့ ကွာရှင်းကြောင်း အကြောင်းကြားစာကို တင်ပြအကြောင်းကြားရပါမည်။ ထို့အပြင် မိခင်နိုင်ငံတွင်လည်း ကွာရှင်း ကြောင်းကို အကြောင်းကြားရပါမည်။ လိုအပ်ပါက ကွာရှင်းကြောင်းအသိအမှတ်ပြုထောက်ခံစာကို ထုတ်ပေးရန် လျှောက်ပါ။ အသေးစိတ်ကို အကြောင်းကြားစာတင်ပြအကြောင်းကြားမည့် မြို့နယ်ရုံး သို့မဟုတ် သံရုံး၊ကောင်စစ်ဝန်ရုံးအား စုံစမ်းမေးမြန်းပါ။

①သံရုံး၊ ကောင်စစ်ဝန်ရုံးများ

ဂျပန်နိုင်ငံသားနှင့်အိမ်ထောင်ပြုထားသောလင်မယား အိမ်ထောင်ကွာရှင်းခြင်း: ဂျပန်နိုင်ငံ၏ ဥပဒေအရ လင်မယားကွာရှင်းရပါမည်။ ကွာရှင်းရန် နှစ်ဦးသဘောတူနေပါက မြို့နယ်ရုံးတွင် နှစ်ဦးသဘောတူ ကွာရှင်းခြင်းကို ဆောင်ရွက်နိုင်ပါသည်။ သဘောတူညီခြင်းမရှိပါက မိသားစုရေးရာ တရားရုံးတွင် ဖျန်ဖြေမှုဖြင့် ကွာရှင်းခြင်း၊ တရားစွဲဆိုပြီး ကွာရှင်းခြင်းကိစ္စကို ဆောင်ရွက်ရပါမည်။ သို့သော်လည်း မိခင်နိုင်ငံ၏ ဥပဒေအရ နှစ်ဦးသဘောတူကွာရှင်းခြင်းကို ခွင့်မပြုထားပါက မြို့နယ်ရုံးတွင် အကြောင်းကြားခြင်း မပြုနိုင်သောကြောင့် မိခင်နိုင်ငံတွင် ကွာရှင်းခြင်းကို ဦးစွာဆောင်ရွက်ရပါမည်။
နိုင်ငံခြားသားအချင်းချင်း အိမ်ထောင်ကွာရှင်းခြင်း: လင်မယားနှစ်ဦးသည် နိုင်ငံသားချင်းမတူပါက ဂျပန်နိုင်ငံ၏ ဥပဒေအရ ကွာရှင်းနိုင်ပါသည်။ သို့သော် နှစ်ဦးသဘောတူကွာရှင်းမှုကို ခွင့်ပြုပေးခြင်းရှိမရှိသည် ကွာရှင်းမည့်သူ၏ နိုင်ငံသားပေါ်မူတည်နေပါသည်။ ထို့အပြင် ဆောင်ရွက်ရမည့် လုပ်ထုံးလုပ်နည်းလည်း မတူညီပါ။

အိမ်ထောင်ပြုကြောင်း၊ ကွာရှင်းကြောင်းအကြောင်းကြားစာကို တင်ပြအကြောင်းကြားသည့်အခါ အခြား အကြောင်းကြားစရာကိစ္စများလည်းရှိပါသည်။ အထူးသဖြင့် နေထိုင်ခွင့် “အိမ်ထောင်ဖက်”ဖြင့် နေထိုင်နေသည့် နိုင်ငံခြားသားသည် လင်မယားကွာရှင်းသည့်အခါ လူဝင်မှုကြီးကြပ်ရေးနှင့် နေထိုင်မှုစီမံခန့်ခွဲရေးအေဂျင်စီသို့ ကွာရှင်းပြီး ၁၄ရက်အတွင်း အကြောင်းကြားရပါမည်။ အကြောင်းမကြားပဲ ဆက်လက်နေထိုင်ပြီး သတ်မှတ်အချိန်ထက် ကျော်လွန်ပါက နေထိုင်ခွင့်ကို ရုတ်သိမ်းပြီး မိခင်နိုင်ငံသို့ ပြန်ရမည့်အခြေအနေဖြစ် သွားနိုင်ပါသည်။
အသေးစိတ်ကို လူဝင်မှုကြီးကြပ်ရေးနှင့် နေထိုင်မှုစီမံခန့်ခွဲရေးအေဂျင်စီ သို့မဟုတ် နိုင်ငံခြားသားနေထိုင်မှု အထွေထွေသတင်းအချက်အလက်စင်တာထံသို့ စုံစမ်းမေးမြန်းပါ။ (http://www.immi-moj.go.jp/english/info/)